విజయవాడ టిటిడి దేవాలయంలో ఘనంగా వార్షిక ఉత్సవాలు

విజయవాడ టిటిడి దేవాలయంలో ఘనంగా వార్షిక ఉత్సవాలు

బెజవాడ ఎక్స్ ప్రెస్,
నగరంలోని పున్నమి తోటలోని శ్రీ టిటిడి (తిరుమల తిరుపతి దేవస్థానం) ఆలయంలో 8 వ తేదీన వార్షిక ఉత్సవాలను వైభవంగా నిర్వహించేందుకు దేవస్థాన కమిటీ సర్వసన్నద్ధమైంది. ఈ ఉత్సవాల సందర్భంగా ఆలయంలో భక్తుల కోసం ప్రత్యేక ఆధ్యాత్మిక కార్యక్రమాలను ఏర్పాటు చేసినట్లు కమిటీ ప్రతినిధులు ఒక ప్రకటనలో తెలిపారు.
ఆధ్యాత్మిక కార్యక్రమాల వివరాలు:
ఉదయం 9:00 గంటల నుండి శ్రీ వేంకటేశ్వర స్వామివారికి శాస్త్రోక్తంగా ‘విశేష అభిషేకం’ నిర్వహించనున్నారు. అనంతరం లోకకల్యాణార్థం, సకాలంలో వర్షాలు కురవాలని ఆకాంక్షిస్తూ అత్యంత పవిత్రమైన “వర్ష వర్ధన హోమం” జరిపించనున్నారు. హోమ పూర్ణాహుతి అనంతరం భక్తులకు తీర్థ ప్రసాదాల పంపిణీ ఉంటుంది. మధ్యాహ్నం 12:00 గంటల నుండి ‘మహా అన్నప్రసాద వినియోగం’ (సంతర్పణ) ప్రారంభమవుతుందని ఆలయ కమిటీ పేర్కొంది.
భక్తులకు సాదర ఆహ్వానం: ఈ వార్షిక మహోత్సవ వేడుకలకు విజయవాడ నగరంతో పాటు పరిసర ప్రాంతాలలోని భక్తులందరూ తమ కుటుంబ సమేతంగా విచ్చేసి, స్వామివారిని దర్శించుకోవాలని దేవస్థాన కమిటీ వినయపూర్వకంగా ఆహ్వానిస్తోంది. ఉత్సవాలలో పాల్గొని ఆ కలియుగ దైవం శ్రీవారి కృపాకటాక్షాలను, తీర్థప్రసాదాలను పొంది తరించాల్సిందిగా కమిటీ సభ్యులు కోరారు.