పవన్
చంద్రబాబు అరెస్టు సమయంలో బయటకు రాని టీడీపీ కార్యకర్తలు
ఎం.గణేశ్, జర్నలిస్టు
ఉప ముఖ్యమంత్రి, జనసేన అధినేత పవన్ కల్యాణ్ చేసిన వ్యాఖ్యలు రాష్ట్ర రాజకీయాల్లో చర్చనీయాంశంగా మారాయి. ‘అడవితల్లికి బాట 2.0’ కార్యక్రమంలో భాగంగా ఆయన చేసిన వ్యాఖ్యలు తెలుగుదేశం పార్టీ శ్రేణుల్లో అసంతృప్తికి కారణమవుతున్నాయనే అభిప్రాయాలు వ్యక్తమవుతున్నాయి. ముఖ్యంగా 2023లో ముఖ్యమంత్రి చంద్రబాబు నాయుడు అరెస్టయిన సమయంలో టీడీపీ కార్యకర్తలు ఎదుర్కొన్న పరిస్థితులను గుర్తు చేస్తూ పవన్ చేసిన వ్యాఖ్యలు ఇప్పుడు కూటమి రాజకీయాల్లో కొత్త చర్చకు తెరలేపాయి.చంద్రబాబు అరెస్టయిన సమయంలో జనసేన శ్రేణులే ముందుండి పోరాడాయని, ఆ సమయంలో టీడీపీ కార్యకర్తలు రోడ్లపైకి రావడానికి భయపడిన పరిస్థితులు ఉన్నాయని పవన్ కల్యాణ్ వ్యాఖ్యానించినట్లు రాజకీయ వర్గాల్లో చర్చ సాగుతోంది. ఈ వ్యాఖ్యలపై టీడీపీ నాయకులు, కార్యకర్తలు తీవ్ర అసంతృప్తి వ్యక్తం చేస్తున్నట్లు తెలుస్తోంది.
చంద్రబాబు అరెస్టు సమయంలో టీడీపీ శ్రేణులు, మహిళా కార్యకర్తలు ఎలాంటి భయానికీ లొంగకుండా పెద్ద ఎత్తున నిరసనలు తెలిపారని ఆ పార్టీ నాయకులు గుర్తు చేస్తున్నారు. అరెస్టుకు నిరసనగా పలువురు నేతలు, కార్యకర్తలు నిరాహార దీక్షలు చేపట్టారని, చంద్రబాబు విడుదలయ్యే వరకు అనేక ప్రాంతాల్లో ఆందోళనలు కొనసాగించారని పేర్కొంటున్నారు. నంద్యాల నుంచి రాజమండ్రి వరకు చంద్రబాబును తరలించిన సమయంలోనూ టీడీపీ శ్రేణులు పెద్ద ఎత్తున నిరసనలు తెలిపాయని గుర్తు చేస్తున్నారు.ఆ సమయంలో జనసేనతో అధికారిక పొత్తు ప్రకటించకముందే టీడీపీ కార్యకర్తలు ఉద్యమాలు నిర్వహించారని, పార్టీ నాయకత్వానికి అండగా నిలిచారని ఆ పార్టీ వర్గాలు చెబుతున్నాయి. సెప్టెంబర్ 14న జనసేనతో పొత్తు ప్రకటన వెలువడిన విషయాన్ని ప్రస్తావిస్తూ, తొలి రోజుల్లో తమకు జనసేన నుంచి ఆశించిన స్థాయిలో సంఘీభావం లభించలేదనే అభిప్రాయాన్ని కొందరు టీడీపీ నాయకులు వ్యక్తం చేస్తున్నారు. పవన్ కల్యాణ్ చంద్రబాబు అరెస్టు సమయంలో హైదరాబాద్ నుంచి రాజమండ్రికి బయలుదేరినప్పటికీ, పోలీసుల ఆంక్షల కారణంగా రోడ్డుపై బైఠాయించి నిరసన తెలిపిన ఘటనను జనసేన శ్రేణులు గుర్తు చేస్తున్నాయి. ఆ సమయంలో పవన్ చూపిన చొరవను అభినందిస్తూనే, టీడీపీ కార్యకర్తలు భయపడ్డారనే వ్యాఖ్యలు చేయడం సరికాదని టీడీపీ వర్గాలు అభిప్రాయపడుతున్నాయి.
కూటమిలోని ప్రధాన భాగస్వామ్య పార్టీల మధ్య పరస్పర గౌరవం, సమన్వయం అత్యంత కీలకమని రాజకీయ విశ్లేషకులు పేర్కొంటున్నారు. ఎన్నికల సమయంలో మూడు పార్టీలు కలిసి పనిచేసి విజయం సాధించిన నేపథ్యంలో, గత పరిణామాలను ప్రస్తావించే క్రమంలో చేసే వ్యాఖ్యలు భాగస్వామ్య పార్టీల కార్యకర్తల మనోభావాలను దెబ్బతీయకుండా ఉండాలని సూచిస్తున్నారు.ఇప్పటికే కూటమి విజయంలో తమ పార్టీ పాత్రపై టీడీపీ, జనసేన శ్రేణుల మధ్య చర్చలు జరుగుతున్న వేళ పవన్ తాజా వ్యాఖ్యలు కొత్త వివాదానికి దారితీసే అవకాశం ఉందనే అభిప్రాయాలు వ్యక్తమవుతున్నాయి. అయితే ఈ వ్యాఖ్యలపై అధికారికంగా పార్టీ నాయకత్వాలు స్పందించిన తీరు, తదుపరి పరిణామాలు కీలకం కానున్నాయి. త్వరలో స్థానిక సంస్థల ఎన్నికలు జరగనున్న నేపథ్యంలో ఈ పరిణామాలు రాజకీయంగా ఎలాంటి ప్రభావం చూపుతాయన్నది ఆసక్తికరంగా మారింది. కూటమి పార్టీల మధ్య సమన్వయం కొనసాగుతుందా? లేక పరస్పర విమర్శలు క్షేత్రస్థాయిలో కార్యకర్తల మధ్య దూరాన్ని పెంచుతాయా? అన్నది రానున్న రోజుల్లో తేలనుంది.